Isang tanker-type vessel ang namataan kahapon sa baybayin ng Burgos, Surigao del Norte matapos umano itong sumadsad sa karagatan na nagdulot ng pangamba sa kaligtasan at posibleng pinsalang pangkalikasan.
Ayon sa ulat ng pamahalaang bayan ng Burgos sa kanilang social media page, agad na inimbestigahan ng mga lokal na awtoridad ang insidente.
Nakikipag-ugnayan na ang Municipal Disaster Risk Reduction and Management Office (MDRRMO) sa Philippine Coast Guard station sa Siargao upang alamin ang kalagayan ng barko.
Sinisiyasat din ng MDRRMO kung may lulan itong mapanganib na kargamento na maaaring makaapekto sa baybayin at mga fishing ground ng bayan.
Napansin ng mga awtoridad na nasa loob ng municipal waters ang tanker at tila nakaangkla malapit sa isang Marine Protected Area, bagay na ikinaalarma ng mga residente.
Dagdag pa rito, ilang residente sa Poblacion ang nag-ulat na nakaamoy umano sila ng parang gas. (Issa Santiago)